Metodoloxía e Plan de Traballo

A metodoloxía do proxecto baséase nun enfoque progresivo, integrado e multiescala que combina a análise de datos hidrolóxicos e morfolóxicos existentes coa modelización numérica hidrodinámica tanto do fluxo como da súa interacción coas turbinas, así como coa posterior avaliación enerxética do potencial hidrocinético. O esquema metodolóxico permite avanzar dende unha caracterización global do medio fluvial ata unha análise local de alta fidelidade da interacción fluxo-dispositivo, garantindo así unha estimación fundamentada do potencial enerxético real dispoñible.

Nunha primeira etapa (Fase 1) levarase a cabo a recompilación, tratamento e análise de datos hidrolóxicos, hidrométricos e morfolóxicos dos ríos procedentes de organismos oficiais e fontes cartográficas dispoñibles. Este datos constituirán a base para a definición e selección preliminar dos tramos de estudo e a configuración e desenvolvemento dos modelos hidrodinámicos.

Posteriormente (Fase 2), desenvolverase unha modelización bidimensional mediante Iber+ nos tramos de estudo, orientada á caracterización espacial do fluxo baixo diferentes escenarios hidrolóxicos representativos. A partir destas simulacións obteranse campos espaciais de caudal, calado e velocidade, que constituirán a información principal para a avaliación do potencial hidrocinético, permitindo identificar as zonas mais favorables. A partir desta análise seleccionaranse localizacións prioritarias nas que se definirán as condicións hidráulicas de referencia para a modelización tridimensional.

Nunha fase posterior (Fase 3) abordarase unha modelización tridimensional de alta fidelidade mediante DualSPHysics, centrada na simulación local da interacción entre o fluxo e diferentes tipoloxías de turbinas hidrocinéticas, partindo das condicións hidráulicas de referencia proporcionadas polas simulacións con Iber+. Esta aproximación permitirá analizar con elevada precisión o comportamento hidrocinético e obter variables clave para a avaliación do rendemento enerxético.

Finalmente (Fase 4), integrarase toda a información obtida para estimar a potencia específica real e a enerxía recuperable, identificar treitos fluviais viables e elaborar a síntese técnica final do proxecto.

O plan de traballo, que se define a continuación, estrutúrase nun período de 9 meses, organizados en tarefas parcialmente solapadas para optimizar os tempos de execución e garantir a coherencia entre as fases.

Tarefas (T):

T1 - Recompilación de datos, análise e selección de treitos fluviais favorables (Meses 1–2)

Tarefa 1.1 Recompilación de datos hidrolóxicos, incluíndo principalmente series de caudais e niveis de auga.
Tarefa 1.2 Recompilación de información morfolóxica e topográfica dos cauces fluviais.
Tarefa 1.3 Identificación e selección preliminar dos cursos fluviais e tramos con potencial para seren obxecto de aplicación do estudo.

Obxectivo específico: OE1.

T2 - Modelización bidimensional de tramos fluviais e priorización de localizacións (Iber+) (Meses 2–5).

Tarefa 2.1 Configuración do modelo: definición do dominio de cálculo, das condicións de contorno, así coma dos parámetros hidráulicos e morfolóxicos necesarios.
Tarefa 2.2 Execución das simulacións hidrodinámicas, calibración e validación con datos dispoñibles (caudal e/ou nivel).
Tarefa 2.3 Obtención e análise das principais características do fluxo que permiten avaliar o potencial hidrocinético, principalmente velocidade e calado.
Tarefa 2.4 Análise e selección das zonas mais favorables para a xeración hidrocinética.
Tarefa 2.5 Obtención das condicións hidráulicas de referencia para seren empregadas como condicións de entrada e de contorno no modelo tridimensional de alta fidelidade.

Obxectivo específico: OE2.

T3 - Modelización tridimensional de alta fidelidade a escala local (DualSPHysics) (Meses 4–8).

Tarefa 3.1 Selección e definición das tipoloxías de turbinas hidrocinéticas a considerar, adaptadas ás condicións hidráulicas dos treitos seleccionados.
Tarefa 3.2 Configuración do modelo: definición do dominio de cálculo local (zona reducida que comprende o emprazamento da turbina), das condicións de contorno (batimetría e condicións hidráulicas proporcionadas por Iber+), e da representación numérica da turbina.
Tarefa 3.3 Execución das simulacións tridimensionais de alta fidelidade.
Tarefa 3.4 Modelización do funcionamento e do aproveitamento hidrocinético das turbinas en relación ás características do fluxo simuladas, obtendo a interacción fluxo–dispositivo.
Tarefa 3.5 Obtención das variables necesarias para analizar o potencial enerxético hidrocinético real dispoñible nos tramos seleccionados.

Obxectivo específico: OE3.

T4 - Avaliación enerxética e síntese final (Meses 7–9).

Tarefa 4.1 Aplicación de formulacións específicas para o cálculo da potencia hidrocinética a partir da información proporcionada polo modelo tridimensional.
Tarefa 4.2 Cálculo da potencia específica e da enerxía recuperable.
Tarefa 4.3 Identificación de treitos fluviais válidos para o aproveitamento hidrocinético.

Obxectivo específico: OE4.